Kalyani Nagar Car Accident Pune | पुणे हिट अँड रन प्रकरण : पोर्शे कार अपघातातील अल्पवयीन मुलाची पुणे पोलीस पुन्हा चौकशी करणार
पुणे : – Kalyani Nagar Car Accident Pune | पुण्यातील कल्याणी नगर येथील पोर्शे कार अपघात (Porsche Car Accident Pune) प्रकरणात मोठी अपडेट समोर आली आहे. या अपघात प्रकरणातील अल्पवयीन आरोपी मुलाची पुणे पोलीस (Pune Police) पुन्हा एकदा चौकशी करणार असल्याची माहिती समोर आली आहे. आरोपी मुलगा सध्या बालसुधारगृहात आहे. मागच्यावेळी केलेल्या चौकशीदरम्यान त्याने पोलिसांना उडवाउडवीची उत्तरे दिली होती. त्यामुळे या प्रकरणात पुणे गुन्हे शाखेचे पोलीस (Pune Crime Branch) अल्पवयीन मुलाची पुन्हा चौकशी करणार आहेत.
पोर्शे कार अपघात प्रकरणातील अल्पवयीन आरोपी सध्या बाल सुधारगृहात आहे. त्याला बुधवारी बाल न्याय मंडळामध्ये (Juvenile Justice Board – JJB) हजर करण्यात आले होते. सुनावणीदरम्यान पुणे पोलिसांनी आरोपी मुलाला 14 दिवस बाल सुधारगृहात ठेवण्याची मागणी केली होती. पोलिसांनी केलेली मागणी बाल न्याय मंडळाने मान्य केली. त्यामुळे आरोपी मुलाला आता 25 जून पर्यंत बाल सुधारगृहात राहावे लागणार आहे. अशातच पुणे पोलीस आरोपीची पुन्हा चौकशी करणार आहेत. ज्यावेळी ही घटना घडली होती त्यावेळी आरोपीने पोलिसांना उडवाउडवीची उत्तरे दिली होती. त्यामुळे आता त्याची पुन्हा चौकशी होणार आहे.
अपघात प्रकरणातील अल्पवयीन मुलाला बाल न्याय मंडळाने 25 जूनपर्यंत बालसुधारगृहात ठेवण्याचे आदेश बुधवारी (दि.12) दिले. 19 मे रोजी कल्याणीनगर भागात आलिशान पोर्शे कार भरधाव वेगात चालवून संगणक अभियंता तरुण-तरुणीला धडक दिली. यामध्ये दोघांचा जागीच मृत्यू झाला. अपघातानंतर पोलिसांनी सखोल तपास करुन अल्पवयीन मुलाला वाचवण्याचा प्रयत्न करणारे बांधकाम व्यावसायिक वडील विशाल अगरवाल (Vishal Agarwal), आई शिवानी अगरवाल (Shivani Vishal Agarwal), आजोबा सुरेंद्र अगरवाल (Surendra Kumar Agarwal) तसेच रक्ताचे नमुने बदलणारे ससून मधील डॉ. अजय तावरे (Dr Ajay Taware), डॉ. श्रीहरी हाळनोर (Dr Shrihari Halnor), शिपाई अतुल घटकांबळे (Atul Ghatkamble), पबमध्ये अल्पवयीन मुलांना मद्य विक्रीकरणारे पब मालक, कर्मचारी यांना अटक केली.
पार्टीत सामील असलेल्या मुलांची चौकशी
दरम्यान, अपघात होण्यापूर्वी अल्पवयीन मुलागा त्याच्या मित्रांसोबत पार्टी करण्यासाठी कोझी आणि ब्लॅक पबमध्ये गेला होता. अल्पवयीन मुलासह त्याच्या मित्रांनी तेथे मद्यप्राशन केले. पार्टीत सामील झालेल्या 15 मुलांची पोलिसांकडून सखोल चौकशी करण्यात आली. पार्टीत सामील झालेल्या मुलांनी प्रत्येकी अडीच हजार रुपये आणले होते. उर्वरित 48 हजार रुपये अपघात करणाऱ्या मुलाने पबमध्ये जमा केल्याची माहिती पुणे पोलिसांना चौकशीत मिळाली.