Sharad Pawar On PM Narendra Modi | “काहीही करा जमीन विकू नका”; शरद पवारांचा गावकऱ्यांना सल्ला; मोदींसह अजित पवारांवर निशाणा

बारामती : Sharad Pawar On PM Narendra Modi | लोकसभा निवडणुकीच्या (Lok Sabha Election) निकालांनंतर शरद पवार शेतकऱ्यांचे प्रश्न जाणून घेण्यासाठी काही तालुक्यात दौरे करीत आहेत. दरम्यान ते जनतेचे आभारही मानताना दिसत आहेत. मागील ५७ वर्षांपासून ही जनता आपल्याबरोबर आहे. त्यामुळे यंदाच्या निवडणुकीतही मला चिंता नव्हती. लोकं समोर येऊन बोलत नव्हती पण दमदाटीच्या भाषणाला उत्तर देताना मतपेटीतून त्यांनी सर्वकाही दाखवून दिलं असे म्हणत शरद पवारांनी अजित पवारांचे नाव न घेता निशाणा साधला.

शरद पवार बारामती तालुक्यात दौऱ्यावर आहेत. आज लोणी भापकर (Loni Bhapkar) गावातून त्यांनी शेतकऱ्यांना मोलाचा सल्ला दिला. ते म्हणाले, ” दमदाटी केली तरी कोणतं बटण दाबायचे हे तुम्हाला चांगलं माहिती आहे, ते तुम्ही दाबलं. या निवडणुकीत एकही पुढारी नव्हता, कुठं गेले होते काय माहित? मी विचारायचो हे होते का, ते होते का, ते कुणीही नव्हतं. कळलं नाही नेत्याला काय झालं? जेव्हा मतमोजणी झाली तेव्हा कळलं?.

आता हा चमत्कार विधानसभेला (Maharashtra Assembly Elections 2024) करायचा आहे. एक चमत्कार तुम्ही करायचा एक चमत्कार मी. पहिले पाणी आणायचं, मग कोणतं कांडे रोवयाचे आणि कोणता डोस कधी द्यायचा हे मी सांगतो, असे म्हणत आगामी विधानसभा निवडणुकांचे रणशिंगही पवारांनी फुंकले. तसेच, काहीही करा पण जमीन विकू नका, जमीन विकू नका मार्ग आपण काढू “असा मोलाचा सल्लाही शरद पवारांनी गावकऱ्यांना दिला.

शरद पवार पुढे म्हणाले, “जे काम करायचं होतं ते तुम्ही केलं, मला काही सांगायची वेळ आली नाही. मोदींपेक्षा जास्त मताने तुमचा खासदार निवडून आला आहे. मोदी सांगायचे मोदी की गॅरंटी. पण उनकी गॅरंटी यहा चली नही, मोदींनी काय माझा बांध कोरला नाही. पण, मोदींचे धोरण आपल्या हिताचे नव्हते, असे म्हणत शरद पवारांनी मोदींच्या भूमिकेवर भाष्य केले.

शेतकरी अडचणीत कसा येईल याचा विचार मोदी सरकार (NDA Modi Govt) करते. मोदी सरकारमधील लोक म्हणतात आम्ही खाणाऱ्या लोकांचा विचार करतो परंतु पिकवणाऱ्याने पिकवले नाही तर खाणारा काय खाईल? असा सवाल शरद पवारांनी केला आहे. सत्ताधाऱ्यांनी काळ्या आईशी ईमान राखणाऱ्या लोकांचा विचार केला पाहिजे, असेही शरद पवार म्हणाले.