Pune Crime News | आर्मीत भरती करण्याचे आमिष दाखवून तरुणांची फसवणुक करणारा जेरबंद; मिलिटरी इटेलिजंट आणि पुणे पोलिसांची संयुक्त कारवाई, कंत्राटी कामगाराने घातला गंडा

पुणे : Pune Crime News | पुण्यात शासकीय परीक्षांसाठी आलेल्या तरुणांना हेरुन त्यांना आर्मीत भरती करतो, असे आमिष दाखवून त्यांच्याकडून लाखो रुपये हडप करणार्‍या एकाला मिलिटरी इंटेलिजंट आणि पुणे पोलिसांनी जेरबंद केले आहे. (Cheating Fraud Case)

मोहित रामसिंग धामी Mohit Ramsing Dhami (वय ३२, रा. उत्तराखंड) असे या भामट्याचे नाव आहे. मोहित धामी हा पुण्यातील कमांड हॉस्पिटल येथील कॅन्टीनमध्ये कंत्राटी कामगार म्हणून काही काळ कामाला होता. त्यामुळे त्याला आर्मी भरतीबाबतची माहिती होती. त्याचा गैरफायदा घेऊन तो बाहेरगावाहून परीक्षांसाठी आलेल्या तरुणांना भुलथापा मारुन फसवत असे.

याबाबत धुळ्यातील एका २३ वर्षाच्या तरुणाने बंडगार्डन पोलीस ठाण्यात फिर्याद दिली आहे. हा प्रकार ३१ मार्च २०२४ ते आजपर्यंत सुरु होता. या बाबत पोलिसांनी दिलेल्या माहितीनुसार, फिर्यादी व त्यांचा मित्र हे स्टाफ सिलेक्शनच्या परीक्षेकरीता पुण्यात आले होते. ३१ मार्च २०२४ रोजी ते परिक्षा देऊन परत धुळ्याला जाण्यासाठी पुणे रेल्वे स्टेशन येथे आले होते. रात्री ८ वाजता त्यांना मोहीत धामी हा भेटला. त्याने तो आर्मी मध्ये असून सध्या कमांड हॉस्पिटल येथे ड्युटीला असल्याचे सांगितले. त्याच्याशी गप्पा मारत असताना त्याने तुम्हाला आर्मीमध्ये जॉईन करुन देतो, असे सांगितले. तेव्हा त्यांनी आमचे वय जास्त झाले आहे, असे सांगितले. तुमचे वय जास्त असले तरी तुमचे काम करुन देतो, असे त्याने सांगितले. त्यानंतर त्यांनी एकमेकांचे मोबाईल नंबर घेतले. ३ एप्रिल २०२४ रोजी त्याने कॉल करुन कागदपत्रे मागवुन घेतली. त्यानंतर त्याने एक क्यु आर कोड असलेला स्कॅनर पाठविला व त्यावर फिर्यादी व त्यांच्या मित्राला ५ हजार रुपये पाठविण्यास सांगितले. त्याप्रमाणे त्यांनी पैसे पाठविले. त्यानंतर तो तुमचे काम करुन देतो, असे सांगत वेगवेगळी कारणे सांगून त्यांच्याकडून पैसे मागत होता. फिर्यादी यांनी त्याला २ लाख ८० हजार रुपये तर, त्यांच्या मित्राने २ लाख रुपये असे दोघांनी मिळून ४ लाख ८० हजार रुपये पाठविले. त्यानंतर तो फिर्यादी व त्यांच्या मित्राचे फोन घेणे टाळू लागला. फिर्यादी यांना शंका आल्याने तो व त्यांचा मित्र गेल्या महिन्याअखेरीला पुण्यात आले. त्यांनी कंमाड हॉस्पिटलमध्ये चौकशी केली. तेव्हा त्यांना असा कोणी कामाला नसल्याचे सांगितले. तेथे त्यांनी आमची फसवणुक झाल्याचे सांगितल्यावर आर्मी इंटेलिजंट युनिटने या दोघांकडून सर्व माहिती घेतली. या मोहीत धामी याने आणखी एकाला फसविल्याचे पुढे आले. आर्मी इंटेलिजंटचे अधिकारी मोहीत धामी याचा शोध घेत असताना मंगळवारी तो पुन्हा पुणे रेल्वे स्टेशन येथे आढळून आला. आर्मी इंटेलिजंटच्या पथकाने त्याला पकडले़ त्याच्याकडे चौकशी केल्यानंतर त्याला बंडगार्डन पोलिसांच्या हवाली केले आहे. बंडगार्डन पोलिसांनी त्याला अटक केली असून सहायक पोलीस निरीक्षक अर्जुन मोहिते अधिक तपास करीत आहेत.