Palghar Crime News | जंगलात रानडुकरांच्या शिकारीसाठी जाण्याचा प्लॅन आखला, चुकीने बंदुकीचे ट्रिगर दाबले गेले अन् अनर्थ झाला, 60 वर्षीय इसमाचा मृत्यू
पालघर : Palghar Crime News | मनोर पोलीस ठाण्याच्या हद्दीतील बोरशेती गावाजवळ जंगलात शिकारीसाठी गेले असता प्राणी समजून चुकून बंदुकीचा ट्रिगर दबला गेल्याने ६० वर्षीय व्यक्तीचा मृत्यू झाला आहे. रमेश जाण्या वरठा (वय-६०) असे मृत्यू झालेल्या व्यक्तीचे नाव आहे. ही घटना मंगळवार (दि.४) संध्याकाळी घडली.
मिळालेल्या माहितीनुसार, बोर शेती किराट रावते व अकोले या गावातील १०-१५ हौशी शिकाऱ्यांनी बोर शेतीच्या जंगलात रानडुकरांच्या शिकारीसाठी जाण्याचे ठरवले होते .बोरशेरीच्या जंगलात अलन डोंगराच्या पायथ्याशी पट्टेरी वाघ आणि २०० किलो वजनापेक्षाही अधिक वजनाची रानडुकरे पाणी पिण्यासाठी येत असल्याचे शिकाऱ्यांना माहीत होते.
काहीजण या प्राण्यांच्या शिकारीसाठी जंगलातील झाडांवर बसले होते. यावेळी काही सहकारी उशिरा आल्याने तसेच मोबाईलचा टॉर्च बॅटरी ही सुरू केली नसल्याने प्राणी येत असल्याचा संशय बळवला आणि त्यातील एका सहकाऱ्याकडून बंदुकीचे ट्रिगर दाबले गेले. यात बंदुकीच्या गोळीने जखमी होऊन रमेश जाण्या वरठा यांचा जागीच मृत्यू झाला.
दरम्यान हे लक्षात येताच मृत सहकाऱ्याला तसेच टाकून इतर सहकाऱ्यांनी जंगलातून पळ काढला. त्यानंतर जंगलात मृतदेह सापडल्याने आजूबाजूच्या परिसरात मोठी खळबळ उडाली .या प्रकरणात मनोर पोलिसांनी सात ते आठ जणांना ताब्यात घेतले आहे. घटनेचा पुढील तपास पोलीस करीत आहेत.
