Beed Police MCOCA Action | पोलिसांचे रेकॉर्डिंग व्हायरल करणाऱ्या आठवले गॅंगवर मकोका, बीड पोलिसांची मोठी कारवाई

बीड : Beed Police MCOCA Action | सरपंच संतोष देशमुख यांच्या हत्या (Santosh Deshmukh Murder Case) प्रकरणाने बीड जिल्हा सध्या चर्चेत आहे. देशमुख कुटुंबीयांच्या न्यायासाठी जिल्ह्यात मोर्चे देखील काढण्यात आले. संतोष देशमुख हत्या प्रकरणामुळे मंत्री धनंजय मुंडेंचे निकटवर्तीय असलेल्या वाल्मिक कराडचेही नाव राज्यभरात चर्चेत आले असून खंडणी व खून प्रकरणात त्यांच्यावर आरोप होत आहेत. वाल्मिक कराडचे पोलिसांशी हितसंबंध असून पोलिसांकडूनच त्याला बळ देण्यात येत असल्याचाही आरोप लोकप्रतिनिधींकडून होत आहे.

दरम्यान, खंडणी प्रकरणात वाल्मिक कराडला अटक केल्यानंतर त्याच्यावर मकोका अंतर्गतही कारवाई करण्यात आली आहे. त्यामुळे, जिल्ह्यातील पोलीस यंत्रणा अलर्ट झाली असून बीडमधील आणखी एका गँगकवर मकोका अंतर्गत कारवाई करण्यात आली आहे. डिसेंबर महिन्यात गोळीबार करणाऱ्या आठवले गॅंगवर देखील पोलिसांनी आता मकोका अंतर्गत गुन्हा दाखल केला आहे. काही दिवसांपूर्वी पोलीस अधिकारी शितल बल्लाळ यांच्यावर आरोप करत ऑडिओ क्लीप व्हायरल करणाऱ्य सनी आठवलेची ही आठवले गँग आहे.

१३ डिसेंबर २०२४ मध्ये पेठ बीड पोलीस ठाणे हद्दीत गोळीबारची घटना घडली होती. त्यातील सहा आरोपींवरही मकोका अंतर्गत कारवाई करण्यात आली आहे. त्यात प्रामुख्याने अक्षय आठवले, सनी आठवले, आशिष आठवले, मनीष क्षीरसागर आणि ओंकार सवई यांचा समावेश आहे. या आरोपींनी आतापर्यंत १९ गंभीर स्वरूपाचे गुन्हे केल्याची पोलीस दफ्तरी नोंद आहे. या संपूर्ण गुन्ह्याचा तपास केल्यानंतर आता आठवले गँगवर मकोका कारवाई करण्यात आली आहे.

सनी आठवलेने आपल्या फेसबुक अकाऊंटवरुन भलीमोठी पोस्ट करत एक ऑडिओ क्लीप व्हायरल केली होती. त्यामध्ये, पोलीस निरीक्षक शितलकुमार बल्लाळ आणि वाल्मिक कराडचे संभाषण असून कराडच्या सांगण्यावरुन पोलीस कामकाज करत असल्याचा आरोपी सनी आठवलेने केला होता. आता, त्याच्यावरही मकोका अंतर्गत कारवाई करण्यात आली आहे.

पोलीस अधीक्षक नवनीत कावत म्हणाले, ” ज्या ठिकाणी गंभीर गुन्हे घडत आहेत. त्या ठिकाणी मकोका प्रस्ताव पाठवला जाणार आहे. तसेच गंभीर स्वरूपातील गुन्हेगाराची पार्श्वभूमी आणि टोळीची माहिती घेऊन ही कारवाई सुरू राहणार आहे.”