Pune PMC News | पुणेकरांनो लक्ष द्या ! सार्वजनिक ठिकाणी थुंकताना, कचरा फेकताना थांबा, महापालिकेकडून होतेय दंडात्मक कारवाई, 18 दिवसात 36 लाखांचा दंड वसूल

पुणे : Pune PMC News | सकाळी शहर स्वच्छ असावे यासाठी पुणे महापालिका प्रशासनाने रस्त्यावरील कचरा रात्रीतूनच उचलण्यासाठी नियोजन सुरु केले आहे. रात्रपाळीमध्ये काम करणारे कर्मचारी, वाहने याचे नियोजन महापालिकेकडून सुरू करण्यात आले आहे. एकीकडे बेशिस्त नागरिक अन् दुसरीकडे सकाळी कचरा उचलण्यास प्रशासनाला उशीर होत असल्याने शहरात कचरा दिसत आहे. पण सकाळ होण्यापूर्वीच शहर स्वच्छ झाल्यास नागरिकांना चांगले वातावरण अनुभवता येणे शक्य होणार आहे.

दरम्यान आता शहरात अस्वच्छता करणाऱ्यांविरुद्ध महापालिकेकडून कारवाई केली जात आहे. १८ दिवसात ३६ लाख रुपयांचा दंड वसूल करण्यात आला आहे. शहरात सार्वजनिक ठिकाणी अस्वच्छता करणाऱ्या आणि सार्वजनिक आरोग्यास धोका निर्माण करणाऱ्या बेशिस्त नागरिकांविरुद्ध नवीन वर्षात ही कारवाई करण्यात आली आहे. महापालिकेकडून १ जानेवारी ते १८ जानेवारी या कालावधीत शहरात दंडात्मक कारवाई केली असून ४५१९ नागरिकांकडून तब्बल ३६ लाख ३४ हजार ३५२ रुपयांचा दंड वसूल करण्यात आला आहे.

महापालिकेने १८ दिवसात आकारलेला दंड खालीलप्रमाणे:

रस्त्यावर थुंकणे: १ लाख २६ हजार
उघड्यावर लघु शंका करणे: ९१ हजार ७००
कचरा जाळणे: ५५ हजार
कचरा वर्गीकरण न करणे: १ लाख ५ हजार
बंदी असलेला मांजा विक्री: २५ हजार ५००
सार्वजनिक ठिकाणी अस्वच्छता: १८ लाख २१ हजार २००
कचरा प्रकल्प बंद असणे: ४० हजार
बांधकाम राडारोडा: ५ लाख ५८ हजार
प्लास्टिक कारवाई: ७ लाख ५५ हजार
बायोमेटिकल वेस्ट: १५ हजार
इतर: ५ हजार