Accident On Pune Pandharpur Palkhi Marg | पुणे-पंढरपूर पालखी महामार्गावरील नीरा-लोणंद परिसरात खड्ड्यात दुचाकी कोसळून युवतीचा जागीच मृत्यू, दोघे गंभीर जखमी

पुणे : Accident On Pune Pandharpur Palkhi Marg | पुणे-पंढरपूर पालखी महामार्गावरील नीरा लोणंद परिसरात खड्ड्यात मोटारसायकल कोसळून युवतीचा जागीच मृत्यू झाल्याची घटना घडली आहे. या घटनेत इतर दोघे गंभीर जखमी झाले आहेत. अंकीता अनिल धायगुडे (वय-२०) असे अपघातात मृत्यू झालेल्या युवतीचे नाव आहे. तर चालक विशाल दौलत धायगुडे (वय-२७), सानिका विलास धायगुडे (वय-१८) हे दोघे गंभीर जखमी झाले आहेत.

मिळालेल्या माहितीनुसार, सोमवार (दि.६) सकाळी साडेसात वाजताच्या सुमारास माणिक सोना पेट्रोल पम्प जवळ बाळूपाटलाचीवाडी येथील तिघेजण दुचाकीवरून जात असताना त्यांची दुचाकी खड्ड्यात कोसळली. यावेळी अंकिता धायगुडेचा जागीच मृत्यू झाला. तर विशाल धायगुडे आणि सानिका धायगुडे गंभीर जखमी झाले.

पालखी मार्गावरील लोणंद ते नीरा दरम्यान रस्त्यात लोणंद नगरपंचायत च्या पाणी लाईन दुरुस्तीचे काम चालू होते. सदर ठिकाणी ठेकेदाराकडून कोणत्याही प्रकारचे बॅरिगेट्स किंवा अडथळा उभारला नसल्याने या कामासाठी खोदलेल्या खड्ड्यात पाणी साचल्यामुळे रस्त्यावरच असणारा हा खड्डा वाहनचालकांच्या लक्षात येत नाही. यामुळे हा अपघात घडला असल्याची शक्यता स्थानिकांकडून व्यक्त होत आहे.

या अपघातानंतर बाळूपाटलाची वाडी येथील ग्रामस्थांनी लोणंद येथील राजमाता अहिल्यादेवी चौक येथे सुमारे अर्धा तास रस्ता अडवून धरत दोषींवर गुन्हा दाखल करून कडक कारवाईची मागणी करण्यात आली. यावेळेस लोणंद पोलीस स्टेशनचे सहाय्यक पोलीस निरीक्षक सुशील भोसले यांनी रास्ता रोको करणाऱ्यांची समजूत काढत त्यांना लोणंद पोलीस स्टेशन येथे बोलावण्यात आले. याप्रकरणी संबंधितांवर लोणंद पोलीस ठाण्यात गुन्हा दाखल करण्याचे काम उशीरपर्यंत सुरु होते.