Satara Crime News | कोयना धरणाच्या शिवसागर जलाशयात मासेमारीसाठी जाळं टाकलं, इतक्यात तोल गेला अन् अनर्थ घडला, रेस्क्यू टीमकडून शोधमोहीम सुरुच
सातारा : Satara Crime News | कोयना धरणाच्या शिवसागर जलाशयात बोटीतून मासेमारी करण्यासाठी जाळे टाकत असताना एकजण बुडून बेपत्ता झाल्याची घटना समोर येत आहे. किसन धोंडिबा कदम (वय-४३) असे त्यांचे नाव आहे. कदम यांचा ग्रामस्थ आणि रेस्क्यू टीमच्या साहाय्याने शोध घेतला मात्र सायंकाळी ६ वाजेपर्यंत ते सापडले नाहीत. शिवसागर जलाशयात खोल आणि थंड पाणी असल्याने अडथळा येत होता.
पोलिसांनी दिलेल्या माहितीनुसार, तापोळा खोऱ्यातील आपटी येथील किसन धोंडीबा कदम हे शिवसागर जलाशयात शुक्रवार (दि.३) रात्री ८ वाजताच्या दरम्यान बोटीतून मच्छीमारीसाठी जाळे टाकण्यासाठी गेले होते. त्यावेळी जाळी टाकत असताना त्यांचा तोल गेल्याने ते पाण्यात बुडाले. याबाबत आपटी गावचे पोलीस पाटील शामराव गायकवाड यांनी या घटनेची माहिती मेढा पोलिसांना कळवली. त्यानंतर आज सकाळपासून स्थानिक नागरिकांनी बोटीच्या साहाय्याने गळ टाकून शोधकार्य सुरू केले.
सकाळी अकराच्या सुमारास महाबळेश्वर, सह्याद्री आणि शिवेंद्रसिंहराजे भोसले रेस्क्यू टीमचे जवान घटनास्थळी दाखल झाले. या टीमने बोटीच्या साहाय्याने शोध घेण्याचा प्रयत्न केला. काही जवानांनी पाण्यात पोहत जाऊन शोध घेतला. मात्र बेपत्ता कदम सापडले नाहीत. त्यातच कोयनेच्या शिवसागर जलाशयाची पाणी पातळी खोल असल्याने तसेच थंडी असल्याने शोधकार्यात अडथळे येत होते. सायंकाळी उशिरा हे शोधकार्य रेस्क्यू टीमने थांबवले. रविवारी सकाळी पुन्हा हे शोधकार्य सुरू करण्यात आले आहे.
दरम्यान, घटनास्थळी मेढा पोलीस ठाण्याचे बामणोली बीट सहाय्यक पोलीस फौजदार अनिल भिसे आणि सहकारी धीरज बेसके दाखल झाले असून ग्रामस्थांच्या मदतीने त्यांनीही शोधमोहीम सुरू केली होती.
