Nagpur Accident News | ढाब्यावरील जेवण जीवावर बेतलं, ट्रक-दुचाकीच्या भीषण अपघातात दोघा मित्रांचा मृत्यू तर एकजण गंभीर जखमी

नागपूर: Nagpur Accident News | भरधाव ट्रकने दुचाकीला दिलेल्या धडकेत दोन तरुणांचा जागीच मृत्यू झाला आहे तर एकजण गंभीर जखमी आहे. आर्यन हुकूमचंद पालिवाल (वय-२३) आणि सुमेध उर्फ सुमित राहुल सिरसाट (वय-१७) अशी मृत्यू झालेल्यांची नावे असून अरमान रवींद्र मडामे (वय-१७) हा तरुण गंभीर जखमी झाला आहे. त्याच्यावर उपचार सुरू आहेत. हा अपघात हिंगणा-गुमगाव मार्गावर घडला आहे.
मिळालेल्या माहितीनुसार, तिघे मित्र हे मोटरसायकलने धाब्यावरून जेवण आणायला गुमगाव कडे गेले होते. तेथून परत घराकडे येत होते. त्यावेळी समृद्धी महामार्गाकडे जाणाऱ्या ट्रकने मोटरसायकलला समोरून जोरदार धडक दिली. या अपघातात चालक आर्यन आणि मागे बसलेल्या सुमेधचा जागीच मृत्यू झाला आहे.
अपघात झाल्यानंतर ट्रकचालकाने घटनास्थळावर ट्रक सोडून पळ काढला. अपघातानंतर सुमारे अर्धा तास त्या रस्त्याकडे कुणी फिरकले नाही. त्यामुळे जखमींना जवळपास तासभर उपचार मिळण्यास उशिर झाला. जर ट्रकचालकाने जखमींना लगेच उपचारासाठी मदत केली असती तर सुमितचा जीव वाचला असता.
अपघाताची माहिती मिळताच हिंगणा पोलीस ठाण्याचे निरीक्षण जितेंद्र बोबडे आणि पोलीस उपनिरीक्षक करणसिंह नागलोथ घटनास्थळी दाखल झाले. जखमी अरमानला उपचारासाठी पाठवण्यात आल्यानंतर अपघातास कारणीभूत ट्रक जप्त करण्यात आला आहे.