Chhatrapati Sambhaji Nagar Accident | प्रति तास 210 च्या स्पीडने धावणाऱ्या कारचे मागचे टायर फुटल्याने भीषण अपघात, कार तीन वेळा उलटली, एकाचा जागीच मृत्यू तर एकजण गंभीर जखमी

छत्रपती संभाजीनगर: Chhatrapati Sambhaji Nagar Accident | प्रति तास २१० किलोमीटर प्रति वेगाने धावणाऱ्या कारचे मागचे टायर फुटल्याने झालेल्या भीषण अपघातात एकाचा मृत्यू झाला आहे तर एकजण गंभीर जखमी आहे. सुनील विजय जाधव (वय-२३, रा- म्हाडा कॉलनी कन्नड) या तरुणाचा अपघातात मृत्यू झाला आहे. तर मयूर ज्ञानेश्वर वाळुंजे (वय-२६ ) हा तरूण गंभीर जखमी झाला आहे. हा भीषण अपघात धुळे-सोलापूर रोडवर कन्नड जवळ शाकंभरी जिनिंग येथे बुधवार (दि.१) मध्यरात्री दोन वाजताच्या सुमारास घडला. याप्रकरणी जखमी तरुणावर शासकीय वैद्यकीय महाविद्यालय घाटी रुग्णालयात उपचार सुरू आहेत.

स्थानिक नागरिकांनी दिलेल्या माहितीनुसार, सुनील जाधव आणि मयूर वाळुंजे हे दोघे मका खरेदी करण्याचा व्यवसाय करत होते. दोघे जिवलग मित्र असल्यामुळे कायम सोबत राहत होते. दरम्यान सुनील व मयूर हे दोघे एम एच २० जीई २५५८ या कारने आठेगाव येथे पाणी भरायला गेले होते. पाणी भरून परतत असताना धुळे सोलापूर महामार्गावर ते जी कार चालवत होते त्या कारचा वेग तब्बल २१० प्रतितास होता.

शाकंबरी जिनिंग जवळ कार येताच अती वेगामुळे कारचे मागचे चाक फुटले. यामुळे चालकाचे नियंत्रण सुटल्याने कार तीन वेळा उलटून रस्त्याच्या बाजूला आदळली. या भीषण अपघातात सुनील जाधव या तरुणाचा दुर्दैवी मृत्यू झाला. तर मयूर वाळुंजे हा गंभीर जखमी झाला आहे. मयूर याच्यावर छत्रपती संभाजी नगर शहरातील खाजगी रुग्णालयात उपचार सुरू आहेत. याप्रकरणी कन्नड शहर पोलीस ठाण्यामध्ये सदर घटनेची नोंद करण्यात आली आहे. या प्रकरणी दिनेश खेडकर संजय आटोळे यांनी घटनास्थळाची पाहणी केली.