Aundh Satara Crime News | औंध : मद्यपान आणि डांगडिंग करताना वाद झाल्यानंतर डोक्यात दगड घालून झाडीत लपवून ठेवला मृतदेह

सातारा : Aundh Satara Crime News | औंध येथील रामदास अशोक दंडवते (वय-२८) या युवकाच्या खून प्रकरणी औंध पोलिसांनी दोघांना अटक केली आहे. रोहन मल्हारी मदने, गुरुराज दत्तात्रय मदने (दोघे रा- खरशिंगे, ता-खटाव) अशी अटक केलेल्या आरोपींची नावे आहेत. (Aundh Murder Case)

पोलिसांनी दिलेल्या माहितीनुसार, शनिवार (दि.२१) दुपारी आरोपी रोहन व गुरूराज मदने व मृत रामदास दंडवते हे सुतार खडवी परिसरात मद्यपान करत बसले होते. या दरम्यान आपापसात वादावादी झाली. शेवटी याचे पर्यावसन मारामारीत झाले. यात रामदास दंडवते याच्या डोक्यात दगड घातल्याने त्याचा मृत्यू झाला. मृतदेह सापडू नये म्हणून आरोपींनी सुतार खडवी जवळच्या झाडीत लपवून ठेवला होता.

दरम्यान याबाबत पोलिसांना या घटनेची माहिती मिळाल्यानंतर सपोनि अविनाश मते यांच्या मार्गदर्शनाखाली गोपूज, औंध, खरशिंगे परिसरात कसून शोध घेतल्यानंतर रामदास दंडवते याचा मृतदेह गोपूज नजीक सापडला. त्यानंतर संशयित आरोपी रोहन मदने यास चौकशीसाठी ताब्यात घेतले. पोलिसी खाक्या दाखवताच त्याने गुन्ह्याची कबुली दिली व यामध्ये आपल्यासह चुलत चुलते गुरूराज मदने सहभागी असल्याचे सांगितले.

पोलिसांनी पथक पाठवून लोणंद येथून मंगळवारी पहाटे गुरूराज मदने यास ताब्यात घेतले. याबाबतची फिर्याद लिला अशोक दंडवते यांनी दिली आहे. या घटनेमुळे औंध परिसरात एकच खळबळ उडाली आहे. अधिक तपास सपोनि अविनाश मते हे करीत आहेत.