Hingoli Crime News | युवतीची हत्या करून मृतदेह शिवारात फेकला, अखेर मृत्यूचे गूढ उकलले, मॉल मधील बिलाने आरोपी पोलिसांच्या जाळ्यात

हिंगोली : Hingoli Crime News | अज्ञात व्यक्तीच्या मृत्यूचा छडा लावण्यात अखेर पोलिसांना यश आले आहे. सदर मृतदेह अहिल्यानगर जिल्ह्यातील जामखेड येथील युवती अलका बाजीराव बेंद्रे हिचा असल्याचे निष्पन्न झाले आहे. २४ डिसेंबर रोजी औंढा नागनाथ तालुक्यातील नागेशवाडीजवळ वन विभागाच्या जंगलात एका अज्ञात युवतीचा मृतदेह आढळून आला होता. शव विच्छेदनानंतर युवतीचा गळा आवळून हत्या करण्यात आल्याचे स्पष्ट झाले. त्या अनुषंगाने औंढा पोलिस ठाण्यात अज्ञात व्यक्तीविरुद्ध खुनाचा गुन्हा दाखल करून तपास सुरू केला होता. (Murder Case)

मृतदेहाची ओळख पटविण्यासाठी घटनास्थळी कोणताही पुरावा आढळून आला नसल्यामुळे पोलिसांसमोर प्रकरणाचा उलगडा करण्याचे मोठे आव्हान होते. सतत चार दिवस ओळख पटविण्यासाठी तिचे छायाचित्र घेऊन स्थानिक गुन्हे शाखा व औंढा पोलिसांचे पथक महाराष्ट्रातील अनेक जिल्ह्यात तपास करीत होते. परंतु मृतदेहाची ओळख पटविण्यात यश आले नाही. शेवटी पुन्हा घटनास्थळ व आजूबाजूच्या परिसराची बारकाईने पाहणी केली असता, घटनास्थळापासून काही अंतरावर एक मोठी बॅग व संभाजीनगर येथील एका मॉलचे बिल मिळून आले. त्याआधारे तपासाची दिशा निश्चित करून तपास सुरू करण्यात आला.

याप्रकरणी मिळालेल्या माहितीच्या आधारे औंढा नागनाथ पोलिस ठाण्याचे एक पथकाने २९ डिसेंबर रोजी जामखेड येथील मृत महिलेच्या घरी जाऊन छायाचित्र दाखविले असता सदर मृतदेह हा अलका बाजीराव बेद्रे हिचा असल्याचे निष्पन्न झाले. या माहितीवरून समांतर तपास करीत असलेल्या स्थानिक गुन्हा शाखेने आरोपीचा शोध लावत मुगट (जि.नांदेड) येथील रहिवासी असलेल्या श्रीकांत सुरेश पिनलवार यास हत्येच्या आरोपाखाली आदिलाबाद येथून ताब्यात घेतले.

अलका हिची श्रीकांत सोबत प्रवासादरम्यान भेट झाली. त्यानंतर ओळखीचे रूपांतर प्रेमात झाले. मागील ९ महिन्यांपासून दोघांनी एकत्र राहण्यास सुरुवात केली. काही काळाने श्रीकांत अलकावर संशय घेऊ लागला. त्यामुळे दोघात वाद होऊ लागले. याचाच मनात राग धरून २३ डिसेंबर रोजी छत्रपती संभाजीनगर परिसरातील भाड्याच्या रूममध्ये अलकाचा गळा दाबून खून केला. त्यानंतर मृतदेह औढा नागनाथ तालुक्यातील नागेशवाडी शिवारात आणून टाकला होता.

या प्रकरणाची कार्यवाही पोलिस अधीक्षक श्रीकृष्ण कोकाटे, उपविभागीय पोलिस अधिकारी अंबादास भुसारे, स्थानिक गुन्हा शाखेचे पोलिस निरीक्षक विकास पाटील, पोलिस निरीक्षक गणेश राहिरे यांच्या मार्गदर्शनाखाली सहायक पोलिस निरीक्षक संतोष शेकडे, शिवसांब घेवारे, उपनिरीक्षक विक्रम विठूबोने, माधव जिव्हारे, कपिल आगलावे, अंमलदार पांडुरंग राठोड, कोंडीबा मगरे, विक्रम कुंदनानी, गजानन पोकळे, किशोर कातकडे, निरंजन नलवार, दत्ता नागरे, आकाश टापरे, किशोर सावंत, विशाल खंडागळे, विठ्ठल काळे, नरेंद्र साळवे, हरिभाऊ गुंजकर, इमरान सिद्दिकी, इकबाल शेख, मदार शेख आदींनी केली.