Palghar News | प्रसूतीनंतर रक्तस्त्राव झाल्याने मातेचा मृत्यू , बाळ सुखरूप
पालघर : Palghar News | गरोदर मातेची प्रसूती झाल्यानंतर रक्तस्त्राव झाल्याने तिचा मृत्यू झाल्याची धक्कादायक घटना मोखाडा येथे घडली आहे. आशा नंदकुमार भुसारे (वय-२२) असे मृत महिलेचे नाव आहे. बाळाला जन्म देऊन मातेचा अशा प्रकारे दुर्दैवी मृत्यू झाल्यामुळे मोखाडा परिसरात सर्वत्र हळहळ व्यक्त होत आहे.
मिळालेल्या माहितीनुसार, आशा भुसारे मोऱ्हांडा ग्रामपंचायत हद्दीतील कोलद्याचा पाडा येथील रहिवासी असून त्यांना प्रसूती वेदना सुरू झाल्याने २४ डिसेंबरला पहाटे तीन वाजताच्या सुमारास मोखाडा ग्रामीण रुग्णालयात दाखल करण्यात आले. त्यानंतर गुरुवारी सकाळी नऊ वाजताच्या सुमारास गरोदर महिलेची प्रसूती झाली.
मात्र प्रसूती झाल्यानंतर महिलेचा रक्तस्त्राव थांबत नसल्याने तिला उपचारासाठी जव्हार येथील पतंगशाह कुटिर रुग्णालय येथे दाखल करण्यात आले. तेथे महिलेला ४ बाटल्या रक्त चढवले व उपचार देखील करण्यात आले.
मात्र मातेची प्रकृती सुधारत नसल्याने दुपारी दीड वाजताच्या सुमरास नाशिकच्या सिव्हिल हॉस्पिटल येथे तिला पाठवण्यात आले. महिलेला नाशिक येथे उपचारासाठी नेत असताना रस्त्यातच तिचा मृत्यू झाला. मृत मातेचे बाळ सुखरूप असून मातेचा मृत्यू झाल्याने सर्वत्र हळहळ व्यक्त होत आहे.
मृत महिलेचे पती नंदकुमार भुसारे म्हणाले, ” पत्नीची डिलिव्हरी नॉर्मल झाली, मात्र तिच्यावर चुकीच्या पद्धतीने व वेळेत उपचार न झाल्याने रक्तस्त्राव झाला. वेळीच नाशिक येथील सिव्हिल रुग्णालयात तिला दाखल केले असते तर उपचार होऊन माझ्या पत्नीचा जीव वाचला असता. या प्रकरणाची योग्य ती चौकशी करून दोषींवर कारवाई करण्यात यावी.”
दरम्यान आता या घटनेमुळे पालघर जिल्ह्यातील दुर्गम भागात अजूनही अद्यावत आरोग्य सुविधा, सक्षम आरोग्य यंत्रणांचा असलेला अभाव, यामुळे होणारी रुग्णांची हेळसांड पुन्हा एकदा अधोरेखित झाली आहे.
