Ambadas Danve On Chhagan Bhujbal | “काहीही होऊ शकतं….” ठाकरे गटाच्या नेत्याचं मोठं विधान; म्हणाले – ” भुजबळ राष्ट्रवादीत राहतील असे वाटत नाही”
मुंबई : Ambadas Danve On Chhagan Bhujbal | मंत्रिमंडळात संधी न मिळाल्याने राष्ट्रवादी गटाचे नेते छगन भुजबळ नाराज आहेत. त्यांनी आपली नाराजी जाहीरपणे बोलून दाखवली आहे. इतकेच नाही तर अजित पवार, सुनील तटकरे आणि प्रफुल्ल पटेल यांच्यावरही भुजबळांनी रोष व्यक्त केला आहे. तसेच “जहाँ नहीं चैना, वहा नहीं रहना”, असे म्हणत मोठं सूचक भाष्यही त्यांनी केले आहे.
दरम्यान छगन भुजबळ यांनी राज्याचे मुख्यमंत्री देवेंद्र फडणवीस यांची दोन दिवसांपूर्वी भेट घेतली. त्यामुळे या भेटीत नेमकी काय चर्चा झाली? याबाबत आता तर्कवितर्क लावले जात आहेत. भुजबळांच्या नाराजीवर शिवसेना ठाकरे गटाचे नेते अंबादास दानवे यांनी मोठा दावा केला आहे. “काहीही होऊ शकते, छगन भुजबळ हे अजित पवार यांच्याबरोबर राहतील असे वाटत नाही”, असे भाष्य अंबादास दानवे यांनी माध्यमांशी बोलताना केले आहे.
अंबादास दानवे म्हणाले, ” काहीही होऊ शकतं. आता कधी काय होईल हे सांगता येत नाही. मात्र, सध्या ज्या पद्धतीने छगन भुजबळ व्यक्त होत आहेत. त्याचा विचार केला तर भुजबळ हे अजित पवार यांच्याबरोबर राहतील की नाही याबाबत सर्वांच्या मनात प्रश्न आहे. तसेच छगन भुजबळ हे देवेंद्र फडणवीस यांना भेटतात. मात्र, अजित पवारांना भेटत नाहीत. याचा अर्थ आपण समजून घेतला पाहिजे.”
ते पुढे म्हणाले, ” मागच्या काही काळात असं म्हटलं जात होतं की, देवेंद्र फडणवीस यांनीच छगन भुजबळ यांना आंदोलने करायला लावली. आता ते सत्य होतं, हे समोर येत आहे. छगन भुजबळ आणखी काही पावलं उचलतील. असं एका दिवसात कोणती पावलं उचलता येत नसतात. त्यासाठी थोडं थांबावं लागतं. आणखी ८, १० दिवस किंवा एक महिना. सर्व गोष्टी एका क्षणात स्पष्ट होत नसतात?”, असे सूचक वक्तव्य अंबादास दानवे यांनी केले आहे.
