Devendra Fadnavis On Chhagan Bhujbal | ‘छगन भुजबळांना मंत्रिमंडळात घेतले नाही त्यामागे…’, अजित पवारांचा उल्लेख करत फडणवीस म्हणाले, “भुजबळांचे मत जरा वेगळं होतं…”
मुंबई : Devendra Fadnavis On Chhagan Bhujbal | विधानसभा निवडणुकीत महायुतीला स्पष्ट बहुमत मिळाले. मुख्यमंत्री कोण होणार? यावरून अनेक दिवस सत्ता स्थापनेचं घोडं अडल्याचे पाहायला मिळालं. त्यानंतर देवेंद्र फडणवीस यांनी मुख्यमंत्री पदाची शपथ घेतली तर एकनाथ शिंदे आणि अजित पवार यांनी उपमुख्यमंत्री पदाची शपथ ग्रहण केली. त्यानंतर मंत्रिमंडळाचा विस्तार झाला. यामध्ये ज्येष्ठ नेते छगन भुजबळ यांच्या नावाचा समावेश नव्हता. दरम्यान भुजबळ नाराज असल्याची चर्चा होऊ लागली आहे.
आज (दि.२३) सकाळी छगन भुजबळांनी मुख्यमंत्री देवेंद्र फडणवीसांची त्यांच्या ‘सागर’ बंगल्यावर भेट घेतली. या भेटीवेळी राज्यातील सध्याची स्थिती व आपल्या मागण्या यासंदर्भात मुख्यमंत्र्यांना सर्वकाही सांगितले असून ते ८ ते १० दिवसांत याबाबत निर्णय घेणार असल्याचे भुजबळ यांनी माध्यमांशी बोलताना सांगितले. भुजबळांच्या नाराजी प्रकरणावर आता देवेंद्र फडणवीसांनी सूचक भाष्य केले आहे. यावेळी त्यांनी उपमुख्यमंत्री अजित पवार यांचेही नाव घेतले आहे.
देवेंद्र फडणवीस म्हणाले, ” मुळात भुजबळांना अजित पवारांनी मंत्रिमंडळात घेतले नाही तेव्हा भुजबळांना डावलण्याचा त्यांचा हेतू नव्हता, त्यांनी मला त्याबाबत सांगितले. आमचा पक्ष राष्ट्रीय पक्ष राहिला आहे. आम्हाला तो राष्ट्रीय स्तरावर मोठा करायचा आहे. देशातल्या अन्य राज्यातही मान्यता असणाऱ्या भुजबळांसारख्या नेत्याला आम्हाला राष्ट्रीय स्तरावर पाठवायचे होते, असे अजित पवारांनी मला सांगितले.
पण अजित पवारांच्या मतापेक्षा भुजबळांचे मत जरा वेगळं होतं. त्यामुळे हा प्रश्न निर्माण झाला आहे. आम्ही सगळे मिळून यावर तोडगा काढू. भुजबळांसारखा नेता आमच्यासोबत राहिला पाहिजे यानुसार या मुद्द्यावर तोडगा काढला जाईल. आम्ही तिन्ही पक्ष एकत्र आहोत. एकत्रच निर्णय करायचे आहेत. भुजबळांबद्दल तिन्ही पक्षांमध्ये आदर आहे” , असे फडणवीस यांनी म्हंटले आहे.
