Gautami Patil At Pune Book Fest | पुणे: ‘मला नाचायला बोलावतात, पण इथे पुस्तक वाचायला बोलावलं’ – गौतमी पाटील (Video)
पुणे : Gautami Patil At Pune Book Fest | पुणे पुस्तक महोत्सवाला आज (दि.२१) नृत्यांगना गौतमी पाटील हिने हजेरी लावली. दरम्यान यावेळी तिने वाचनाची प्रेरणा घेत पुस्तक वाचनाची सुरुवात करण्याचा निर्धार व्यक्त केला. यावेळी प्रवीण तरडे आणि त्यांच्या पत्नीने गौतमीला पुस्तक भेट देत वाचनाची नवी सवय अंगीकारण्यासाठी प्रेरणा दिली.
माध्यमांशी संवाद साधताना गौतमी पाटील म्हणाली, ” मला इतर ठिकाणी नाचायला बोलावतात, पण इथे पुस्तक वाचायला बोलावलं गेलं आहे, याचे मला खूप अप्रूप वाटतेय. पुण्यात एवढा मोठा पुस्तक महोत्सव भरतो हे मला आज समजले. आता यापुढे मोकळ्या वेळेत नक्कीच पुस्तक वाचायला सुरुवात करेन. मी लहानपणापासून डान्स करते. पण पुस्तक वाचनाची संधी आजवर मिळाली नव्हती. मात्र, या महोत्सवाने मला पुस्तक वाचनाची नवी प्रेरणा दिली. आता मी नक्की पुस्तक वाचेन. सर्वांनी पुस्तक वाचायला सुरुवात केली पाहिजे. “
प्रसिद्ध दिग्दर्शक प्रवीण तरडे यांनी गौतमीला पुणे पुस्तक महोत्सवाला आमंत्रित करून पुस्तक वाचनासाठी प्रोत्साहित केले. त्यावर बोलताना ती पुढे म्हणाली, ” प्रवीण दादा सुचवेल तेच पुस्तक वाचणार आहे. शिवाजी महाराजांचे पुस्तक नक्की वाचेन. तसेच फकिरा हे पुस्तक वाचण्यासाठीही प्रोत्साहन मिळालं आहे.”
गौतमीच्या या सकारात्मक बदलामुळे पुणे पुस्तक महोत्सवातील हजेरी अधिक खास बनली आहे. पुस्तक महोत्सव हे केवळ वाचनप्रेमींसाठीच नाही तर नवोदित वाचकांना वाचनाची गोडी लावणारे व्यासपीठ ठरल्याचा आनंद पुस्तकप्रेमींनी व्यक्त केला.
