Vijay Shivtare On Ajit Pawar | अजित पवारांवर विजय शिवतारेंचे टीकास्त्र; म्हणाले – ‘तेवढी त्यांची ताकद नाही’
पुणे : Vijay Shivtare On Ajit Pawar | मंत्रिमंडळ विस्तारानंतर महायुतीच्या नेत्यांमधील नाराजी बाहेर येऊ लागली आहे. मंत्रिमंडळ विस्तारात अनेक दिग्गज नेत्यांना डच्चू देण्यात आला आहे तर अनेक नव्या चेहऱ्यांना संधी देण्यात आली आहे. त्यामुळे मंत्रिपद न मिळालेल्या नाराज नेत्यांनी जाहीरपणे आपली नाराजी बोलून दाखवली आहे. पुरंदरचे शिवसेना शिंदे गटाचे आमदार विजय शिवतारे यांनीही आपली नाराजी व्यक्त केली आहे.
“महाराष्ट्राचा बिहार झाला आहे. कारण इथं प्रादेशिक समतोल न राखता जातीय समतोल राखण्यासाठी प्राधान्य दिल्याचं दिसत आहे. मला मंत्रिपद मिळालं नाही, याचं जास्त वाईट वाटत नाही. मात्र महायुतीतील तीनही नेत्यांनी जी वागणूक दिली, ती चुकीची आहे. हे नेते साधे भेटायलाही तयार नाहीत. आम्ही या नेत्यांचे गुलाम नाही,” अशा शब्दांत शिवतारे यांनी निशाणा साधला.
आम्ही नेत्यांचे गुलाम नाहीत,असे म्हणत नागपूर येथील विधिमंडळाचे हिवाळी अधिवेशन सोडून आमदार शिवतारे यांनी थेट आपला मतदारसंघ गाठला होता. मतदारसंघात विविध कार्यक्रमांना उपस्थित राहिल्यानंतर आता विजय शिवतारेंनी पुन्हा एकदा आपली भूमिका मांडली असून त्यांचा शिवसेनेचे मुख्य नेते एकनाथ शिंदे यांच्याविषयीचा राग शांत झाल्याचे दिसत आहे.
“दोन दिवस आधी मला मंत्रिपद मिळणार नसल्याची कल्पना दिली असती तर काहीच वाटले नसते. पण माझे सर्व कुटुंबीय आले होते. सोबतच मतदारसंघातील कार्यकर्ते ३०० हून अधिक गाड्या घेऊन नागपूरला आले होते. या सगळ्यांचा हिरमोड झाला. त्यामुळे प्रचंड अस्वस्थता होती.
मला वैयक्तिक हितासाठी मंत्रिपद नको होते, तर राज्याच्या विकासात योगदान देण्याची माझी क्षमता आहे आणि त्यासाठी मंत्रिपद मिळावे, अशी माझी इच्छा होती. पण ती पूर्ण झाली नाही. मी आता सर्व कार्यकर्त्यांना समजावले आहे. शेवटी शिवसेना हे माझं कुटुंब समजतो,” असे म्हणत आपण नाराज नसल्याचे शिवतारे यांनी म्हंटले आहे.
तुमचा मंत्रिमंडळातून पत्ता कट करण्यात अजित पवारांचा हात आहे का, असा प्रश्न माध्यम प्रतिनिधींनी शिवतारे यांना विचारला असता ते म्हणाले, “अजित पवार यांची एवढी ताकद नाही. एकनाथ शिंदे असे कोणाचे ऐकून निर्णय घेत नाहीत. तसंच अनेक जण वाईटावर असताना आम्ही २७ हजारांचे मताधिक्य मिळवले” असा टोलाही शिवतारे यांनी लगावला आहे.
