Allu Arjun Arrested | पुष्पा २ प्रकरणी अभिनेता अल्लू अर्जुनला अटक; नेमकं कारण काय? जाणून घ्या

हैदराबाद : Allu Arjun Arrested | ‘पुष्पा २’ या चित्रपटाचा प्रीमिअरवेळी (दि.४) झालेल्या चेंगराचेंगरीत ३५ वर्षीय महिलेचा मृत्यू झाला होता. मृत महिलेच्या कुटुंबियांनी अल्लू अर्जुन विरोधात तक्रार दाखल केली होती. त्यानुसार शहर पोलिसांनी अल्लू अर्जुन, त्याची सुरक्षा टीम आणि थिएटर व्यवस्थापनाविरुद्ध भारतीय न्याय संहितेच्या कलम १०५ आणि ११८ (१) अंतर्गत चिक्कडपल्ली पोलीस ठाण्यात गुन्हा दाखल करण्यात आला होता. याप्रकरणी आता अभिनेता अल्लू अर्जुनला अटक करण्यात आली आहे.

दरम्यान दाखल झालेली एफआयआर रद्द करण्यासाठी अल्लू अर्जुनने (दि.११) तेलंगणा उच्च न्यायालयात धाव घेतली होती. हैदराबादमधील संध्या थिएटरमध्ये ‘पुष्पा २’च्या प्रीमिअरदरम्यान चेंगराचेंगरीत श्वास गुदमरल्यामुळे एका महिलेचा मृत्यू झाल्याप्रकरणी त्याच्याविरुद्ध दाखल केलेला एफआयआर रद्द करण्याची मागणी केली होती. चेंगराचेंगरीत ३५ वर्षीय महिलेचा मृत्यू झाला तर तिच्या ८ वर्षांच्या मुलाला रुग्णालयात दाखल करण्यात आले होते.