Pune Crime Branch News | पुणे: गज्या मारणे टोळीतील गुंड तडीपार असतानाही शहरात फिरत होता बिनधास्त; दोघांना अटक

पुणे : Pune Crime Branch News | पुणे शहर, पिंपरी चिंचवड व पुणे जिल्ह्यामधून २ वर्षांसाठी तडीपार (Tadipari Action) केले असतानाही ते शहरात बिनधास्तपणे फिरत होते. अशा दोघा तडीपार गुंडांना गुन्हे शाखेच्या युनिट ३ च्या पथकाने अटक केली. (Pune Police News)

अभिजित ऊर्फ चौक्या तुकाराम येळवंडे (वय २६, रा. जाधव चाळ, काकडे पॅलेसशेजारी, कर्वेनगर) असे या तडीपार गुंडाचे नाव आहे. अभिजित येळवंडे हा गज्या मारणे टोळीचा सदस्य आहे. गज्या मारणे टोळीतील सदस्यांसह १८ जणांना पुणे पोलिसांनी २०१७ मध्ये महापालिका निवडणुकीच्या काळात एकाचवेळी तडीपार केले होते. त्यात चौक्या याचा समावेश होता. त्याला पोलीस उपायुक्त संभाजी कदम यांनी २८ ऑगस्ट २०२४ पासून २ वर्षांसाठी पुणे शहर, पिंपरी चिंचवड व पुणे जिल्ह्यातून दुसर्‍यांदा तडीपार केले होते. असे असतानाही तो तडीपारीचा भंग करुन शहरात आला होता.

पोलीस अंमलदार प्रतिक मोरे व गणेश शिंदे हे तडीपार आरोपी चेक करीत असताना वारजे माळवाडीत तो आढळून आला. पोलिसांनी त्याला ताब्यात घेऊन पुढील कारवाईसाठी वारजे माळवाडी पोलिसांच्या हवाली केले.

खंडु ऊर्फ पॅडी मारुती म्हेत्रे (वय २२, रा. शिवकृपा अपार्टमेंट, हॅपी कॉलनी, वडगाव बुद्रुक, सिंहगड रोड) असे दुसर्‍या तडीपार गुंडाचे नाव आहे. पोलीस उपायुक्त संभाजी कदम यांनी त्याला पुणे शहर, पिंपरी चिंचवड आणि पुणे जिल्ह्यातून ९ जून २०२४ पासून २ वर्षे तडीपार केले होते.

पोलीस हवालदार गणेश सुतार व विनोद जाधव हे तडीपार आरोपी चेक करीत असताना शिवकृपा अपार्टमेंट येथे खंडु म्हेत्रे हा आढळून आला. पोलिसांनी त्याला ताब्यात घेऊन पुढील कारवाईसाठी सिंहगड रोड पोलिसांच्या हवाली केले.

ही कारवाई पोलीस उपायुक्त निखिल पिंगळे, सहायक पोलीस आयुक्त गणेश इंगळे यांच्या मार्गदर्शनाखाली युनिट तीन कडील वरिष्ठ पोलीस निरीक्षक रंगराव पवार व त्यांच्या सहकार्‍यांनी केली आहे.