Nana Patole On Ajit Pawar NCP Group | नाना पटोलेंचा अजित पवार गटाच्या बड्या नेत्यावर हल्लाबोल; म्हणाले – ‘सत्तेची मौजमस्ती करणं, देशाची संपत्ती विकणं आणि श्रीमंत होणं असं यांचं काम’
गोंदिया : Nana Patole On Ajit Pawar NCP Group | “पाच वर्ष सत्तेची मौजमस्ती करणं आणि देशाची संपत्ती विकणं आणि तिथूनच श्रीमंत होणं असं काम या लोकांनी केलं”, असे म्हणत काँग्रेस प्रदेशाध्यक्ष नाना पटोले यांनी राष्ट्रवादी अजित पवार गटाचे नेते प्रफुल्ल पटेल (Praful Patel) यांच्यावर निशाणा साधला आहे.
काल (दि.९) भंडाऱ्यात विंडविल कंपनीचा भूमिपूजन सोहळा पार पडला. यावेळी प्रफुल्ल पटेल यांनी पटोले यांना ते भावी ते भावीचं राहणार असं वक्तव्य केलं होतं. यावर आज नाना पटोले यांनी भंडाऱ्यात प्रत्युत्तर देताना प्रफुल्ल पटेल यांनी माझ्या विरोधात षडयंत्र रचल्याचा घणाघात केला आहे.
नाना पटोले म्हणाले, “भंडारा गोंदिया जिल्ह्याच्या लोकांना त्यांच्याकडून फार काही अपेक्षा नाहीत. त्यांनी भंडारा आणि गोंदिया जिल्ह्यातील जनतेची मतं घेऊन, त्यांना मोठं मोठी स्वप्न दाखवली. ती स्वप्न त्यांनी कधीच पूर्ण करण्याचं काम केलं नाही. पाच वर्ष सत्तेची मौजमस्ती करणं आणि देशाची संपत्ती विकणं आणि तिथूनच श्रीमंत होणं असं काम या लोकांनी केलं”, अशी टीका पटोले यांनी केली.
“विकास काय असतो हे भंडारा-गोंदिया जिल्ह्याच्या जनतेला काही महिन्यातच कळणार आहे. भंडारा-गोंदिया जिल्ह्याच्या जनतेनं व मला सदैव आशीर्वाद दिलेला आहे. त्यांचे आज माझ्याबद्दलचे जे विचार आहेत, त्या विचाराला मी पूर्णपणे पलटवणार आहे. भंडारा गोंदिया जिल्ह्याच्या जनतेच्या विश्वासात मी पुन्हा खरा उतरणार असल्याचे”, पटोले यांनी म्हंटले.
