Dr Ajay Taware | डॉ. अजय तावरेंवर मोठी कारवाई ! SIT चा अहवाल मंत्र्यांकडे सादर

पुणे: Dr Ajay Taware | कल्याणीनगर अपघात प्रकरणाबाबत (Kalyani Nagar Accident) मुख्यमंत्री एकनाथ शिंदे (Eknath Shinde) यांनी पुणे पोलीस आयुक्तांशी (Pune CP) फोनवरून चर्चा केल्याची माहिती आहे. त्यामध्ये बिल्डर, मंत्री, आमदार, खासदार कुणाचाही सहभाग असल्यास त्याला आरोपी करा. समाजात या प्रकरणाच्या माध्यमातून चांगला संदेश जायला हवा असे मुख्यमंत्र्यांकडून पोलीस आयुक्तांना निर्देश देण्यात आले आहेत. तसेच या प्रकरणाची सखोल चौकशी करण्याच्या सूचनाही देण्यात आल्या आहेत.

कल्याणीनगर अपघात प्रकरणात पुणे शहर गुन्हे शाखेने (Pune Crime Branch) ससून रुग्णालयातील (Sassoon Hospital) फॉरेन्सिक लॅबचे प्रमुख डॉ. अजय तावरे आणि डॉ. श्रीहरी हळनोर (Dr Shrihari Halnor) या दोघा डॉक्टरांना कल्याणीनगर अपघात प्रकरणातील अल्पवयीन मुलाच्या रक्ताच्या नमुन्यात फेरफार केल्याप्रकरणी अटक केली. या प्रकरणाबाबत चौकशी करण्यासाठी एसआयटी समिती निर्माण केली आहे.

या एसआयटी समितीत जेजे रुग्णालयाच्या अधिष्ठाता डॉ. पल्लवी सापळे (Dr Pallavi Saple), मुंबईतील डॉक्टर गजानन चव्हाण (Dr Gajanan Chavan), छत्रपती संभाजीनगर येथील डॉक्टर सुधीर चौधरी (Dr Sudhir Chowdhury) यांचा समावेश आहे. डॉ. पल्लवी सापळे यांच्या नेतृत्वात ही एसआयटी समिती काम करत असून पुढील काही तासात डॉ. अजय तावरेंवर कारवाई केली जाण्याची शक्यता आहे.

रक्त तपासणी अहवालात फेरफार प्रकरणी तयार करण्यात आलेल्या एसआयटीच्या प्रमुख डॉ. पल्लवी सापळे यांनी आपला अहवाल वैद्यकीय शिक्षण विभागाचे आयुक्त राजीव निवातकर (Rajeev Nivatkar) यांना सादर केला. आता तो अहवाल वैद्यकीय शिक्षणमंत्र्यांना देखील प्राप्त झाला.

अहवाल प्राप्त झाल्याने तातडीने क्लास वन अधिकारी डॉ.अजय तावरे यांच्या कारवाईबाबत मुख्यमंत्र्यांना कळवण्याची प्रक्रिया सुरू आहे तर डॉ. श्रीहरी हरनोळ हे क्लास टू चे रँकचे अधिकारी आहेत.

हरनोळ आणि शिपाई घटकांबळे यांची तातडीने शासन स्तरावर आता कारवाई झाली असून डॉ. तावरेंकडील पदभार काढून घेण्यात आला आहे. पुण्यातील ससून रुग्णालयाचे अधिष्ठाता डॉ. विनायक काळे यांनी कारवाई संदर्भात माहिती दिली आहे. त्यानुसार, डॉ. अजय तावरे यांच्याकडून न्याय वैद्यकशास्त्र विभागप्रमुख चार्ज काढून घेण्यात आला असून विजय जाधव यांच्याकडे तो चार्ज देण्यात आला आहे.

याप्रकरणी, अटकेत असलेल्या शिपाई अतुल घटकांबळेसही निलंबित करण्यात आले आहे. तर, वैद्यकीय क्षेत्रातील दुसरे मुख्य आरोपी असलेले श्रीहरी हळनोर हे तात्पुरत्या स्वरुपात वैद्यकीय अधिकारी पदावर कार्यरत असल्याने २८ तारखेलाच त्यांची सेवा समाप्त करण्यात आल्याची माहिती विनायक काळे (Dr Vinayak Kale) यांनी दिली.