Rohit Pawar On PM Narendra Modi | ‘कुटुंब सांभाळण्याची गोष्ट आपल्या तोंडून शोभते का?’, मोदींच्या शरद पवारांवरील ‘त्या’ टीकेला रोहित पवारांची प्रत्युत्तर
बारामती : – Rohit Pawar On PM Narendra Modi | जो या वयात स्वत:चं कुटुंब सांभाळू शकत नाही, तो महाराष्ट्र काय साभाळेल अशी टीका पंतप्रधान नरेंद्र मोदी यांनी ज्येष्ठ नेते शरद पवार (Sharad Pawar) यांच्यावर एका वृत्तवाहिनीला दिलेल्या मुलाखतीत केली होती. या टीकेनंतर शरद पवार गटाकडून पंतप्रधान मोदींना लक्ष्य करण्यात येत आहे. या टीकेला आमदार रोहित पवार यांनी प्रत्युत्तर दिले आहे. एक्स या समाज माध्यमावर पोस्ट करत त्यांनी याबाबत प्रतिक्रिया दिली आहे.
काय म्हणाले पंतप्रधान नरेंद्र मोदी?
गुरुवारी पंतप्रधान नरेंद्र मोदी यांनी एका वृत्तवाहिनीला मुलाखत दिली. यावेळी बोलताना त्यांनी महाराष्ट्रातील विविध मुद्यांवर भाष्य केलं. यावेळी त्यांनी राष्ट्रवादी काँग्रेसमधील फुटीबाबत विचारण्यात आले. यावर बोलताना मोदी म्हणाले, जो स्वत:चं कुटुंब सांभाळू शकत नाही, तो महाराष्ट्र काय सांभाळेल अशी टीका केली होती.
राष्ट्रवादी काँग्रेसमधील फूट हा राजकीय विषय नाही. शरद पवार यांनी याला कितीही राजकीय विषय बनवण्याचा प्रयत्न केला, तरी महाराष्ट्रातील जनतेला हे मान्य होणार नाही. हा पूर्णपणे त्यांच्या कुटुंबाचा विषय आहे. शरद पवार यांचा वारसा काम करणाऱ्या त्यांच्या पुतण्याला मिळेल, की मुलगी म्हणून सुप्रिया सुळे यांना मिळेल, यासाठी सुरु असलेलं हे भांडण आहे. शरद पवार या वयात जर कुटुंब सांभाळू शकत नसतील, तर ते महाराष्ट्र काय सांभाळतील, असे पंतप्रधान मोदी यांनी म्हटले होते.
रोहित पवारांचे प्रत्युत्तर
पंतप्रधान नरेंद्र मोदी यांच्या टीकेला आमदार रोहित पवार यांनी प्रत्युत्तर दिलं असून कुटुंब सांभाळण्याची गोष्ट आपल्या तोंडून शोभते का? असा सवाल त्यांनी मोदींना विचारला आहे. लोका सांगे ब्रम्हज्ञान आणि स्वतः मात्र कोरडे पाषाण, अशी तुमची गत झाली आहे, अशी टीका रोहित पवारांनी केली आहे.
‘पत्रकारांना कधीही सामोरे न जाणाऱ्या आपल्यासारख्या व्यक्तिमत्त्वाला महाराष्ट्रासाठी एक स्पेशल मुलाखत करावी लागतेय. यावरूनच मराठी स्वाभिमानाचा आणि पवार साहेबांचा आपण किती धसका घेतला, हे आज कळलं. असो! पण मराठी माणूस दिल्लीला कशाप्रकारे झुकवू शकतो याचा एक स्वाभिमानी मराठी माणूस म्हणून नक्कीच अभिमान आहे’, अशी प्रतिक्रियाही रोहित पवारांनी दिली.
